څپې څپې خبرې
د ژوند د ورکې فلسفې غوندې خوږې خبرې وکړې جانان په لنډه ساه وړې وړې خبرې
نن يې پر شونډو باندې وېره دغماز خوره وه پټې يې وکړلې د سترگو اينې خبرې
زما پر زړه دې رپ د سترگو دومره دروند پريوځي لکه چې كلي كې مشران کوي پخې خبرې
دلمر له وړانگو نه شرمېږي چې رسوا يې نه کړي سپوږمۍ او ستوري کړي يو بل سره د شپې خبرې
شمسزيه داسې چې له تورو نه نغمې جوړوې دکلي سيند درته راوړي څپې څپې خبرې