|
جيحون راغى
زما اوښكي شوي جاري، كه جيحون راغى
آسمان شو په سلګو، كه بيلتون راغى
په سارا كي بيا ليلا، ليلا ناري شوي
داسي بريښي ګريوان څيري مجنون راغى
يا جهان د تاريكۍ درياب لاهو كړ
يا قيامت شو په صفحه د ګردون راغى
يا جهان د خود خواهي تبي نسكور كا
يا دوران د غم لړلي ژوندون راغى
يا مي زړه په تيز نښتر د بڼو غوڅ شو
يا سيلاب د آه افسوس په لړمون راغى
د ختن غرڅه آهنګ د مستۍ ساز كړ
چي (زګيروى) غشو د عشق ته زبون راغى
|
