يوسف هيواد دوست :::افغانستان يو جعلي نوم دی لطيف پدرام افکار او ګروهې

دافغانستان دولسمشرۍ دكانديدانو په ډله كې يو هم ښاغلى لطيف ( پدرام ) وو. له هغه ځايه چې زه لطيف ( پدرام ) سره پېژنم او ديو ماركسيست، ليننست په توګه يې دروسانو داشغال په وخت كې ...

دهغوى له ډېرو پيرزوينو ګټه اخيستې، ژرمې ذهن ته په بېلابېلو پړاونو كې دهغه دريځ او په تېره بيا دهغه افغان دښمنه دريځ راغى. پام مې شو چې دخپل كتابتون په يوه دوسيه كې دهغه په قلم يو خپور شوى مطلب هم لرم. په ډېره منډه مې دخپل كتابتون له كړكيو يوه كړكۍ پرانيستله او نوموړې دوسيه مې ترلاسه كړه راغلم دمېز تر شا كېناستم چې دغه مقاله يو ځل بيا ولولم. دغه مقاله چې سرليك يې دى ( اګاهي قومي وبحران هويت در افغانستان) دايران دكيهان دورځپاڼې د۱۳۸۱ كال په ۸۴۰ ګڼه كې خپره شوې. دمقالې له پيل كېدو نه مځكې ورځپاڼې دهغه دمقالې څوغټ ټكي رااخيستي (( افغانستان يك نام جعلي است.... نامهاى اريانا يا خراسان براى افغانستان مطرح است)). كله چې دا مقاله څوك ولولي نو بې له شكه دا پايله اخلي چې ددغې مقالې ليكوال چې په اصل كې دځان او دخپلو ملګرو او همفكرانو نظرايات، اندونه او ګروهې بيانوي په دغه مقاله كې سرتر پايه له (( افغان ))، (( افغانستان))، (( پښتون))، (( پښتو )) او د دغې خاورې له ملي حاكميت او خپلواكۍ او اتحاد سره له ورايه خپله دښمني ښودلې ده. هغه خپله لومړنۍ حمله داسې پيل كوي: (( از ۱۷۴۷م ( تاسيس نخستين دولت افغانى ) به اينسو سياست پشتونيزه كردن افغانستان، تضعيف زبانهاى وفرهنګهاى اقوام ديګر به ويژه زبان و فرهنګ فارسي در دستور كار حكام پشتون قرار داشته است)). وګورۍ قدرمنو لوستونكو چې ددغه ښاغلي په خبرو كې څومره دتاريخ او واقعيت خلاف ټكي پراته دي. لومړى خو دافغانستان دولت په ۱۷۴۷م كال كې نه دى جوړ شوى، دغه دولت چې ښاغلى پدرام يې يادوي دا دستر احمدشاه بابا په لاس ديو پياوړي مركزي دولت او وروسته دافغاني امپراتورۍ دجوړولو دولت وو. هماغه شان چې د (( افغان )) نوم يو لرغونى مفهوم او ديو متمدن ملت نوم دى په همدې شان د(( دافغان لومړني دولتونه )) هم په همدې نامه تر شپږو زرو كالو وړاندې موجوديت درلود او همدلته په بلخ، بخدي، پكتيانا، پكتيكا، ګندهارا، كابل او كابورا، او ټكسيلا كې چې داپګانانو، يا اوغانانو، ياافغانانو اصلي ټاټوبى وو جوړشوي او دادى تر ننه يې لمنه غزېدلې او برحال ولسمشر يې ښاغلى حامد كرزى دى.

بل ځاى پدرام افغانستان يو جعلي نوم ګڼي او داسې وايي چې : (( .... اقوام غير پشتون نه اين اسم را دوست داشتند ونه در ضمير خود انرا پذيرفته بودند.....)) قدرمنو هېوادوالو! ښه ځير شۍ دغه دپښتون سره په دښمنۍ كې وريت شوى شخص چې هويت يې هم لاسم نه دى څرګند زموږ دهېواد دغه شان ستر وياړ او افتخار پرسر هم ملنډې وهي او په جار خپله دغه بې بنياده خبره كوي، چې دانوم جعلي دى اودغه جوړښت جعلي دى! ښاغلي پدرام به نه وي لوستي او يا به يې افغان دښمنه احساسات دې ته نه پريږدي چې دا ومني (( چې افغانستان څه ددوه درې پيړيو نه نوم دى او نه دولت، افغانستان څه دڅلور پنځو پيړيو نه خاوره ده او نه داسلام په راتګ سره دا نوم ورته غوره شوى. افغانستان د دې سيمې دشپږو زرو نه پخوا يوه تاريخي سيمه او دافغان ملت داوسيدو ټاټوبى دى. دتاريخ يمني ليكوال ابو نصر محمد عبدالبارالعتبي په واضيح توګه وايي: (( افغان داوغان تعريب دى چې داسلام نه وړاندې دنني افغانستان اوسيدونكو ته ويل كېږي. )) دغه راز دمسټر بيلو په وينا دافغان لفظ (( اغوان )) دايو زوړ او پخوانى اريايي لفظ دى چې اريايي رېښه لري. دانډيكا ژباړونكى مسټر كوندل هم دخپلو څېړنو په پاى كې وايي چې (( افغان )) نوم دسانسګرت ديو لفظ وران شوى شكل دى.)) داسلامي دورې مورخين لكه ابوريحان البيروني، فردوسي طوسي، ابول الفضل بيهقي، مناج السراج او داسې نور هم په خپلو اثارو كې وايي چې (( افغان )) يو زوړ او اريايي نوم دى او هغو خلكو ته ويل كېږي چې په نني افغانستان كې او ان يو څه نور هم په پراخه اندازه په همدې سيمه كې اوسيږي او داسيمه د دوى اصلي سيمه ده.